JARING : KULINER KHAS YANG BIKIN KANGEN

Mun pian urang banua pasti kedada istilah kada tahu lawan makanan nang sebuting nih yaitu jaring alias jengkol jer bahasa indonesianya, matan bahari makanan ni sudah akrab wan kita dan sudah jadi makanan sahari hari matan padatuan sampai wayah ini. 

Amun di Jawa urang tahunya jaring tu dimasak rendang atawa disemur atau amun urang Sunda rancak dimakan mantah mantah bapalit disambal lawan lalapan. Mun di Banjar lain lagi kisahnya jaring alias jengkol dimasak gasan dikipung  wara. Hen napa tiya.

( jengkol mentah)

Bila pian ke Banjar kada ngalih mun handak mancari makanan ini, biasanya di pasar tradisional apalagi di daerah hulu sungai masih banyak acil acil nang bejualan jaring. Mun di Martapura tepatnya di komplek pertokoaan permata cahaya bumi selamat banyak acil acil nang manjual makanan ini becampur lawan waday waday banjar lainnya.

(Acil lagi asyik bedagang jaring)

Siapa nang kada suah terasai jaring ala Banjar?uma ae ruginya. Biarpun baunya kada seratus persen hilang tapi makanan ini banyak nang katuju.  Hmmm rasanya nang khas becampur tahilala pacah di ilat ujar urang tu pasti meulah pian jadi kaganangan bila lawas kada mamakan. 

Proses maulah jaring sampai siap dimakan mamarlukan waktu nang kada satumat, ujar kisah acil nang biasa maulah jaring. Imbah dikupas matan kulitnya Jaring dirandam dahulu samalaman imbah tu hanyar dijarang di dandangan atau di panci ganal sampai ditanggar bahari hari di atas api, kena mun pina sudah lawas banyunya diganti wan nang hanyar pulang, nang kaya itu baulang ulang sampai dikira kira jaringnya sudah bujur bujur kawa dimakan. manjarangnya dicampuri sagala macam kaya daun pandan, daun nangka sampai habu kayu, ujar tu gasan mambuangi gatah jaring supaya pas jaring dimakan kd dijaratnya alias sakit bakamih julak ae.

Amun malihat kaya itu lawasnya acil maharagu jaring ulun bujuran rasanya kada sanggup jadi tukang jaring apalagi maambil alih gawian acil, jadi ulun putuskan ulun manukar haja gin 😅😅😅

Jadi kaingatan waktu ada kawan matan Medan pas hanyar datang ka Banjar, bingung waktu disurungi jaring batahilala. Kanapa ujarnya jaring jadi dikipung? sakit parut ulun mun kaingatan ekspresinya pina aneh waktu marasai jaring 😜😜😜

Ada jua takisah suah membawa jaring ke kantor, sakalinya banyak nang katuju kada urang Banjar kada urang Jawa. Timbul jadinya masing masingnya bapasan minta tukarakan, alhasil ulun isuk harinya tulak ka kantor manggantiakan gawian acil jaring mambawa sapalastik habang isi lima puluh bungkus jaring ja berataan.

( Makanan jaring ala banjar)

Jadi ulun rasa mun jadi urang banjar kada lengkap rasanya bila kada suah merasai makanan nang satu ini. Sebab sabujurannya makanan ini kadada ditamui dimana mana, adanya di Banjar ja, tatangis pian mencari di pulau jawa mun mangidam jaring kacuali ada urang banjar nang bagana di jawa cangkal meulah sorang. 

Artinya kita musti besyukur bahwa di Banua kita ni banyak makanan nang unik. Ayo sanak barataan kita palihara kaunikan makanan khas banua kita supaya kada hilang diganti makanan modern nang sabujurannnya jauh dari budaya daerah kita.